Scout í gang

Hann fór í gang í dag eftir langt hlé, International Scout, fyrrum L-579. Vakti það mikla gleði hjá sumum og mikla nostalgíu hjá öðrum. Þetta gerðist við handayfirlagningu Árna á Akri, sem kallaður var til eftir að mynd af samskonar bíl barst í pósti - (Takk Árni og Brian). Ég var stödd í gróðurhúsinu þegar þessi merki atburður gerðist og heyrði gamalkunnugt malið gegnum traktorsdrunurnar. Þustu þá óteljandi minningar fram um ævintýralegar ferðir á þessum bíl - sem var í notkun hér frá því áður en ég fékk bílpróf þangað til um síðustu aldamót. (Meira en 20 ár). Greyið hefur ryðgað þónokkuð við að hanga aðgerðarlaus fyrir utan Sögusetrið í vetur, en ekki var að heyra að neitt annað alvarlegt amaði að honum.  Vantar reyndar rafgeymi og sviss, en það eru nú bara smámunir þegar maður er kominn á þennan aldur. Markús sér reyndar fram á ævilangt verkefni við að ryðbæta - en hann gerir þá ekki annað af sér á meðan.

Veit kannski einhver um svissinn? Ég veit nefnilega um lykilinn.

 

Athugasemdir

[Rósa Aðalsteinsdóttir, 5.4.2009 kl. 22:11]

Sæl og blessuð

Engir bloggvinir, nennir enginn að kvitta? Eru fleiri en ég að draga úr að kvitta hjá þeim sem nenna ekki að kvitta hjá mér?

Gott að Greyið fór í gang. Malaði hann ekki bara ágætlega?

Vertu Guði falinn

Kær kveðja/Rósa