Vandi að velja

Ég sótti um inngöngu í tvo háskóla næsta vetur í fjarnámi. - Kennaraháskólann, vegna þess að síðustu 14 ár hef ég verið tónlistarkennari, og nú heimta menn á þeim bæ prófskírteini og pappíara. Ég sat á sínum tíma heilt ár í sálarfræði og tvö ár í heimspeki og hef eiginlega enga persónulega þörf fyrir að læra meira í þeim fræðum. Verst að ég skyldi ekki nenna að ljúka BA prófi þá. - Svo sótti ég líka um í Landbúnaðarháskólanum. Ég er viss um að það er miklu skemmtilegra. Vandinn er sá að ég efast stórlega um að afburða námshæfileikar mínir dugi til að stunda fjarnám í tveimur skólum í einu.  Nú þarf ég að velja - eða borga dágóða upphæð fyrir að hugsa mig um lengur.  Þeir allra nánustu telja að ég eigi að fara í Kennaraháskólann. Nú eru góð ráð vel þegin.

Athugasemdir

[gerður rósa gunnarsdóttir, 1.7.2007 kl. 03:33]

Fer eftir því hvað þú ert praktískt þenkjandi. Ég myndi alltaf velja það sem væri óskynsamlegra (svo fremi þú sért skynsöm ;) ) , það er á endanum það sem gefur lífinu gildi :)

[Gudny Einars Pearson (IP-tala skráð) 1.7.2007 kl. 10:16]

Ekki spurning, kenno fyrst og sidan landbunadarhaskolann.

[Guðrún Markúsdóttir (IP-tala skráð) 1.7.2007 kl. 18:48]

Ég hef nefnilega alla ævi (og nú eru árin komin vel á fimmta tug) verið ópraktísk í námsvali - og bara lært það sem mér virtist óskynsamlegt og skemmtilegt.  E.t.v. er mál að breyta til, en frænka, ef ég klára fyrst landbúnaðarháskólann, þá dugar eitt ár í viðbót til að fá kennararéttindi - ég verð hvort sem er ekki píanókennari af því að fara í kennaraháskólann.  Ég er ekki enn sannfærð.

[Guðrún Markúsdóttir, 1.7.2007 kl. 19:04]

Takk Zoa fyrir að vilja vera bloggvinur minn. Þú ert tvímælalaust skemmtilegasti bloggarinn, ég sá það þegar ég álpaðist af tilviljun inn á síðuna þína um daginn. Ég mundi hiklaust giftast þér ef ég væri af hinu kyninu, en þar sem ég er byrjandi í bloggfaginu fann ég ekki réttu takkana til að svara skoðanakönnuninni. Takk fyrir góð ráð, ef ég hefði framtakssemi á við þig mundi ég hiklaust fara í landbúnaðarháskólann og hefja síðan einhvern _skynsamlegan rekstur á jörðinni minni. En ég er skræfa, svo e.t.v. fer ég að ráðum frænkunnar hér að ofan. Ég mæli með við frænku að hún skoðin síðuna þína.